ILOILO CITY – Daku ang risgo nga madasig ang paglaton sang COVID-19 kun nagatinir sa air conditioned kag enclosed place.
Ini ang pahayag ni Engr. Nilo Jardeleza nga isa ka structural engineer kag miyembro sang academe, may kaangtanan sa na record nga COVID-19 cases sa mga private kag government offices.
Sa interview sang Bombo Radyo kay Engr. Jardeleza, iya ginpahayag nga mas makapaayo nga sa isa ka workplace nga air conditioned, may yara sang ventilation agud nga indi magbalik-balik ang ginahaklo nga hangin.
Suno kay Engr. Jardeleza, bisan ang grupo sang mga Engineer ang nagaduso nga mas makapaayo nga may yara sang ventilation ang isa ka building agud nga makasulod ang preska nga hangin bangud nga kun nagasuksok sang face mask sa malawig nga tion, pabalik-balik lamang nga ginahaklo ang carbon dioxide nga ginapaguwa paagi sa pagginhawa.
Magluwas diri, isa man sa ginsuhestyon ni Engr. Jardeleza amo nga dapat ipaathag kag tun-an sang maayo ang tuhoy sa ginapatuman nga 1-meter physical distance bangud nga kun para sa iya, tuman ka lapit ang nasambit nga measurement.
Mahimo suno sa natungdan nga ang ginatumod sang Inter-Agency Task Force amo ang 1-meter radius kag ang prescribed distance ang nagalab-ot sa 2 meters.
