Indi na mangin excuse ang COVID-19 pandemic sa patigayunon nga road clearing operations.
Sa interview sang Bombo Radyo kay Punong Barangay Hector Obligacion sang Barangay Rizal Estanzuela, Iloilo City Proper, iya ginpahayag nga bug-os ang pwersa sang ila nga barangay agud buligan ang Iloilo City Government sa pagpanghawan sa naga-obstruct sa mga dalanon.
Suno kay Obligacion, sa una nga hugnat sang Oplan Hawan Karsada sang nagligad nga tuig, wala na sang mga talipapa kag naga-illegal park nga mga salakyan sa ila barangay apang liwat nga nagbalik sang nag-untat ang road clearing operations.
Ginaamat-amat na subong himos ang naga-illegal park nga mga pedicabs, tricycles, kag iban nga pribado nga mga salakyan.
Ang Oplan Hawan Karsada ang may kaangtanan sa gin-isyu ni Department of the Interior and Local Government Secretary Eduardo Año nga Memorandum 2020-145 nga nagahatag sa local government units (LGUs) sang tion tubtob sa Enero 15, 2021 nga hawanon ang mga dalanon.
