Nagpahanumdom si Ret. PCol. Uldarico Garbanzos sang Iloilo City Traffic and Transportation Management Office nga may ara sang ipatuman nga mga road closures para sa paalabuton nga mga aktibidad angot sa Kasadyahan kag Dinagyang Festival 2026.
Sa interview sang Bombo Radyo kay Ret. PCol. Garbanzos, iya ginpahayag nga madamo nga mga bahin sang siudad ang pagasiraduhon ilabi na sa bahin sang Iloilo Freedom Grandstand tubtob sa West Visayas State University.
Suno man sa iya, pagasiguraduhon ang bilog nga JM Basa Street kag Iznart St., bangud nga ini ang magaserbe nga mayor nga ruta para sa Opening Salvo.
Pagaumpisahan ang road closure alas-11 sa aga sa mga mayor nga ruta sa siudad.
Dugang pa niya nga nagakoordinar naman sila sa mga barangay agud nga makabulig man ang ila nga mga awtoridad sa pagpalapta sang impormasyon angot sa road closure.
Nagpatigayon man sang Road clearing operations ang Public Order and Safety Management Office (POSMO) antes ang pagahiwaton nga Opening Salvo sang Kasadyahan kag Dinagyang tribes competition.
Sa interview sang Bombo Radyo kay Cyril Octavio, Chief Operation sang POSMO, iya ginpahayag nga ila gina-engganyo ang publiko nga magamit ukon magsakay na lang sa mga pampubliko nga salakyan ukon mag-commute kag indi na anay magdala sang pribado nga salakyan.
Ini agud nga malikawan ang pagpugok sang trapiko sa paalabuton nga mga aktibidad sa siudad.
