Nag-expire na ang road closure permit sang proyekto sang Iloilo City District Engineering Office sa JM Basa Street, nga ginahimo subong sang contractor, suno kay Councilor Johnny Young, Chairman sang Committee on Engineering, Construction and Public Works.
Sa interview sang Bombo Radyo kay Councilor Young, ginpahayag niya nga nangayo sang extension ang contractor sang proyekto apang gin-kwestyon niya ang pagka-delay sang trabaho.
Ginplano niya nga ipatawag liwat ang contractor agud istoryahan ang posibilidad sang extension kag klaruhon ang timeline sang proyekto.
Ginpabutyag man sang konsehal nga dapat natapos na ini sang nagligad nga tuig antes pa mag-abot ang Paskwa kag Dinagyang Festival, apang wala ini natuman.
Padayon nga ginatutukan sang komite ang isyu agud masiguro nga indi madugayan pa ang kahimtangan sang dalanon.
