ILOILO CITY – Kabahin na sa pagpanghanda sa General Community Quarantine ang ginapatuman nga road closure sa palibot sang Iloilo Terminal Market.
Nahibalu-an nga epektibo subong nga adlaw, Mayo 5, tubtub Disyembre 31, magapabilin nga sirado ang Mabini, Rizal, De Leon, Quezon, Jalandoni kag Fuentes Sts. santo sa Regulation Ordinance 2020-063 nga ginpasar sang Iloilo City Council.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga ang road closure sa palibot sang merkado ang isa sa mga pamaagi agud nga indi magdinaguso ang manugbakal kag mapatuman ang physical distancing.
Suno kay Conlu, ang Iloilo Terminal Market ang nagaserbe nga bagsakan sang mga produkto halin sa iban nga lugar rason nga kinahanglan nga istriktuhan ang ginapatuman nga preventive measures.
Ini bangud nga bisan isa lang ang infected sang virus, madali lang ang paglaton sini bangud nga populated area ang palibot sang nasambit nga merkado.
May kaangtanan naman sa delivery sang produkto, ginpahayag sang natungdan nga may yara sang car pass system nga ipatuman kag ang salakyan nga maga-agi sa nasambit nga lugar ang ipaidalom sa disinfection.
