Road closure sa mga dalanon sa Barangay Ungka II, Pavia, Iloilo, magaumpisa na sa Lunes, Marso 15

ILOILO – Padayon pa ang pag-istorya sang Department of Public Works and Highways (DPWH) sa mga tag-iya sang duta nga maapektuhan sang pagpatukod sang P480-million nga flyover sa Barangay Ungka II, Pavia, Iloilo.

Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga bangud sa pagtukod sang flyover, nagkitid ang dalan sa diin ang sadto anay 2 lanes nahimo nalang nga 1 lane.

Gin-ako man ni Conlu nga dako ini nga problema bangud malawig pa ang negosasyon sa tunga sang mga lot owners kag DPWH.

Ini ang isa sa mga nangin kaundan sang pagsinapol sa diin ginpatawag ang PSTMO kag DPWH sang Committee on Transportation sang Sangguniang Bayan sa Pavia, Iloilo.

Samtang, maumpisa na sa Lunes, Marso 15 ang road closure sa mga dalanon malapit sa ginatukod nga flyover sa Barangay Ungka II, Pavia, Iloilo.

Suno kay Conlu, magalawig ang road closure tubtob sa Domingo, Marso 21, umpisa las 7:00 sang aga tubtob las 5:00 sang hapon.

Katuyuan sini suno kay Conlu nga mahatagan ligwa ang pag-install sang girders nga kinahanglanon sa nasambit nga Flyover.

Lakip sa mga siraduhan nga dalan amo ang U-turn slot malapit sa exit sang Christ the King sa Barangay Ungka II, Jaro, Iloilo City padulong sa intersection sang Circumferential Road sa Barangay Ungka II, Pavia, Iloilo.

Yari ang proposed alternate route para sa mga commuters halin sa Sta. Barbara kag Pavia nga magapadulong sa Iloilo City:

1. Circumferential Road to Barangay Tacas -Quintis Salas -Jaro Plaza
2. Circumferential Road to Barangay Tacas – Buhang – Jaro Plaza
3. Circumferential Road to Barangay Hibao-an Mandurriao
4. Pavia – Barangay Tacas – Quintin Salas- Jaro Plaza
5. Pavia – Barangay Hibaoan (sa Bangga Singko) – Mandurriao

Yari naman ang proposed alternate route para sa mga commuters nga magahalin sa Iloilo City kag padulong sa Sta. Barbara:

1. Jaro – Quintin Salas – Barangay Tacas – Pavia Road
2. Jaro – Circumferential Road – City Mall Pavia – Pavia
3. Jaro – Mandurriao – Hibaoan – Circumferential Road – Pavia