LA PAZ, ILOILO CITY – Nag-umpisa na subong nga adlaw ang road closure kag re-routing scheme sa palibot sang Lapaz Public Market.
Ini ang kaangot sa construction kag improvements sang merkado.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga magalawig sang duha ka tuig ang construction sang nasambit nga merkado rason nga duha man ka tuig ang road closure kag re-routing scheme.
Wala sang pagbag-o sa rota sang mga salakyan nga magahalin sa Jaro district kag padulong sa Iloilo City proper.
Apang kun halin naman sa Iloilo City proper kag padulong sa Jaro district, nagakadapat nga magaderetso na sa Luna Street La Paz kag indi na magliko sa La Paz Market.
Apang kun mapadulong naman sa La Paz kag naghalin sa Iloilo Hall of Justice, mahimo mag-right turn kag deresto sa Huervana Street tubtub sa La Paz plaza.
Sa mga nagalabay naman sa likod sang Iloilo Provincial Capitol, mahimo mag-right turn tubtub sa La Paz plaza.
Apang kun mapadulong naman sa St. Clements , nagakadapat nga ma-left turn sa Mabini Street, left turn sa Burgos Street, kag pabalik sa Luna Street La Paz.
Kun halin naman sa La Paz plaza kag padulong sa padulong sa Jaro Plaza, indi mahimo mag-right turn sa atubang sang La Paz Market sa baylo ma-left turn sa Rizal Street.
Sa mga magapadulong naman sa Esplanade, nagakadapat nga magbalay sa Mabini, kag ma-left turn sa Burgos.
Nagpangayo man sang paghangop si Conlu sa mga motorista nga apektado sang road closure kag re-routing scheme.
