ILOILO CITY- Wala na naman nadayon ang pagsirado sang dalan kag re-routing scheme sa palibot sang Lapaz Public Market nga natalana kuntani nga mag-umpisa subong nga adlaw angot sa rehabilitation sang merkado.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ang rason sini amo ang ginpatigayon sang Iloilo City District Engineering Office (ICDEO) sa Huervana Street.
Suno kay Conlu, sa iya pagkahibalo, halin sa La Paz plaza lang padulong sa La Granja ang apektado sang rehabilitation sang ICDEO apang ulihi na niya nahibaluan nga bilog nga Huervana Street ang apektado.
Pahayag ni Conlu, gin-istoryahan na nila sang ICDEO kag sang contractor sa proyekto nga amat-amaton lang anay kag indi pagtingubon ang pag-rehabilitate sang Huervana Street agud nga may mahimo pa nga agyan ang mga salakyan.
Dugang niya, may yara man sila sang ginahitso nga traffic management plan.
Bangud sini, posible nga sa una nga semana sang Mayo na mapatuman ang closure sang dalan kag re-routing scheme sa palibot sang Lapaz Public Market.
Nahibaluan nga ang duration sang rehabilitation sang dalan Huervana ang anom ka bulan samtang duha ka tuig naman ang La Paz public market.
