Ipatuman ang road closure sa pila ka dalan sa Iloilo City kadungan sang pag-obserbar sang Semana Santa.
Ini ang magasugod sa Abril 16 tubtob 20, 2025
Sa interview sang Bombo Radyo kay Retired Police Colonel Uldarico Garbanzos, head sang Iloilo City Traffic and Transportation Management Office (TTMO), iya ginpahayag nga ipatuman ang one-way traffic scheme sa Libertad-Lapuz, halin Rizal Street padulong sa Muelle Loney Street.
Suno kay Garbanzos, indi makasulod ang mga motorista sa Muelle Loney / Cesar Drilon Bridge padulong Libertad-Lapuz tubtob sa Rizal Street.
Samtang, ang tanan nga mga motorista nga nagahalin sa Muelle Loney Street padulong Libertad-Lapuz ang mahimo nga mag-agi sa alternate routes via Quirino Bridge, padulong sa Rizal Street kag sa ila tagsa ka destinasyon.
Dugang ni Garbanzos, ginpatuman ang amo nga tikang bangud sa ginalauman nga pagdugok sang mga pasahero padulong sa Parola Wharf nga magapauli para sa Semana Santa.
