Tatlo ka mga anggulo ang ginasundan sang Estancia Municipal Police Station kaangot sa natabo nga massacre sa tatlo ka mga lamharon nga mga negosyante sa Barangay Villa Panian, Estancia, Iloilo.
Sa interview sang Bombo Radyo kay Pol. Lt. Joebert Amado, hepe sang Estancia Municipal Police Station, iya ginpahayag nga ini nga mga anggulo amo ang robbery, away sa online sabong, kag ang personal nga away.
Ginkumpirma man sang Estancia PNP nga lunsay negatibo sa paraffin test ang mga biktima nga sanday Chrysler Floyd Fernandez sang Jereos, La Paz, Iloilo City; John Paul “JP” Mark Bosque sang Lopez Jaena Sur, La Paz, Iloilo City; kag Mark Clarence Libao sang Tacas, Jaro, Iloilo City.
Wala pa nahatag sa Estancia Police ang opisyal nga resulta sang autopsy.
Negatibo man sa paraffin test ang lone survivor nga si Jevron Parohinog, ang business partner sang mga biktima nga subong ginakabig witness, person of interest, kag boluntaryo nga nagpabilin sa paghinakop sang Estancia Municipal Police Station.
Ginkonsiderar ang anggulo sa robbery bangud sa ginapahayag 7.5 million pesos nga nadula sa salakyan sang mga biktima sang natabo ang krimen sang Septyembre 14 sang kaagahon.
Sunod sa anggulo amo ang posible away sa online sabong, bangud kun matandaan, una na nga ginsaysay ni Parohinog sa Estancia MPS nga naghulam sa iya si Bosque sang P7.5 million — P1.5 million diri ang ibayad suno sa iya sa utang ni JP sa online sabong. Ini nga claim ang una naman nga ginbali ni Veronica Dazon nga nobya ni Bosque. Kun basehan ang pahayag ni Dazon, wala sang hulam nga kuwarta si Bosque kay Parohinog. Ang matuod suno sa iya, P7 million ang utang ni Parohinog sa iya kag kay Bosque kag P3 million ang iya utang kay Fernandes.
Sunod sa anggulo amo ang personal grudge sa ‘wala nahibaluan nga persona’ suno kay Amado. Una na nga ginpahayag sang Police Regional Office 6 nga sandig sa inisyal nga imbestigasyon, kilala sang mga biktima ang suspek ukon mga suspek.
DUGANG NGA WITNESSES KAG EBIDENSYA
Indi conclusive ang resulta sang paraffin test. Apisar wala sang bisan isa sa mga biktima kag survivor ang nagpositibo sa sini nga test, padayon ang dalagan sang kaso.
Yara sa paghinakop sang Estancia Police ang cellphones nanday Libao, Parohinog, kag Fernandes. Ang dash camera naman kag ang cellphone ni Bosque ang nauna hatag sa Regional Anti-Cybercrime Unit (RACU) sa Police Regional Office 6.
May dugang man nga witnesses suno sa hepe nga amo ang ginalauman nga makapasanag sa imbestigasyon.
Gina-countercheck ang tanan nga statement ni Parohinog.
Una na nga ginpahayag sang Iloilo Police Provincial Office nga natapos naman ang ang facial composite sketch nga ginpatigayon sandig sa deskripsyon ni Parohinog sa nawong sang mga suspek. Mangita man ang mga pulis sang dugang nga closed circuit television camera footages nga posible naka-capture sa duha ka tawo nga ginapahayag ni Parojinog nga nagsakay sa motorsiklo kag amo ang ginatudlo nga may kahimuan sa krimen.##
