ILOILO CITY – Mabug-at ang kaso nga Robbery with Homicide nga ginpasaka batok sa duha ka mga suspek nga amo ang ginatudlo responsable sa pagluthang-patay sa isa ka Chinese nga negosyante sa dalan Iznart, Iloilo City Proper.
Ginpasaka ang kaso batok kanday Andy Mahinay alyas “Hapon”, 38-anyos, residente sang Brgy. Nonoy, City Proper kag iya ihado nga si alyas Janjan, 16-anyos nga anak sang barangay kagawad sang nasambit man nga barangay.
Ang duha ka nasambit nga suspek ang lunsay yara na sa Iloilo City Police Station 1. Sa interview sang Bombo Radyo kay Police Major Francisco Paguia Jr., hepe sang Iloilo City Police Station 1, iya ginpahayag nga may yara sila sang eyewitness ukon testigo nga makapamatuod nga si Alyas Hapon ang nangamot sa pagluthang sa biktima samtang si Alyas Janjan naman ang nagserbe nga lookout.
Suno kay Paguia, napasa na sa City Prosecutor’s Office ang complaint batok sa duha.
Indi man makumpirma ni Paguia kun may yara na sang daan nga hiligut-anon sa tunga sang biktima kag ni Alyas Hapon bangud wala man suno sa iya nagahambal si Alyas Hapon samtang kun basehan naman ang pahayag sang pamilya sang Chinese nga negosyante, wala ini sang nakaaway sa ila nga lugar.
Pagpanghold-up ang ginatutukan nga rason sang kapulisan.
Ginforward naman sa crime laboratory ang recovered empty fired cartridge agud matumod kun registered ukon loose firearm ang gingamit sa pagpangluthang.
