Madala sa imbestigasyon sang Office of the Ombudsman sanday Senator Robin Padilla kag Senator Jinggoy Estrada kaangot sa natabo nga ginamo sa Senado sang Myerkules sang gab-i, Mayo 13.
Si Padilla ang ginatudlo nga ulihi nga upod ni Senator Ronald “Bato” dela Rosa sang nagguwa ini sa Senado sang Huwebes, Mayo 14, pasado alas dos sang kaagahon, kasunod sang arrest warrant halin sa International Criminal Court (ICC).
Una naman nga ginkumpirma sang National Bureau of Investigation (NBI) nga lakip na sa ila nga ginakonsiderar nga persons of interest si Padilla.
Sa pihak nga bahin, imbestigaran si Estrada suno sa Ombudsman bangud sa kontrobersyal sini nga pahayag nga “itago niyo yung CCTV.”
Suno kay Ombudsman Jesus Crispin “Boying” Remulla, lakip man pati ang NBI sa ila nga usisaon pati man ang kapulisan kag siguraduhon nila nga wala sang bias.
“Ang imbestigasyon na ito, kasama lahat. Kasama ang NBI dito na ating iimbestigahan. Kasama rito ang OSSA. Kasama rin iyong mga pulis na nagpunta roon sa lugar na iyon para malaman natin ang buong pangyayari mula sa perspektibo ng gobyerno,” suno sa iya sa press briefing subong nga hapon.
Una na nga gin-athag ni Senator Estrada kaina nga wala sang iban nga kahulugan ang iya paghambal sang “itago n’yo ‘yung CCTV” kadungan sang ginamo sa sulod sang Senado.
Ginkondenar man sang senador ang mga nagabali sang iya ginhambal nga nagtuga suno sa iya sang sala nga interpretasyon sa social media.
Suno sa iya, ang ginatumod niya amo ang pag-secure sang CCTV footage nga magaserbe bilang importante nga ebidensya sa insidente.
Pahayag pa sini, nauna naman nga ginmandu ni Senate President Alan Peter Cayetano nga i-secure ang footage samtang nagapamangkot naman si Sen. Loren Legarda kun nakuhaan bala sang CCTV ang natabo.
Una na nga gin-insister ni Cayetano nga “under attack” gid ang Senado sang amo nga gab-i — baliskad sa mga pahayag nga drama lang nila ini ukon scripted ang gunfire incident agud nga mapapalagyo si Dela Rosa nga subong kumpirmado na nga wala na gid man sa Senate Building.#
