Nagsabat si Vice President Leni Robredo kasunod sang pahayag ni Presidente Rodrigo Duterte nga indi siya kwalipikado nga magpadalagan bilang presidente sang pungsod.
Wala sang kumpirmasyon halin kay Robredo kun mapadalagan siya sa pagka-presidente sa 2022, apang suno sa iya, indi man si Presidente Duterte ang makahambal kun kwalipikado siya ukon indi.
Suno kay Robredo, ang mga pumuluyo lang ang may poder nga makadesisyon. “Hindi naman siya ang magdedesisyon kung qualified ko o hindi. Taumbayan ang magdedesisyon.”
Matandaan nga sa pre-recorded nga national address ni Duterte nga ginpalayag sang Lunes sang gab-i, ginlaslasan niya si Robredo bangud ginpakamalaot ni Robredo ang iya panawagan sa Estados Unidos nga magbayad agud mapadayon ang Visiting Forces Agreement (VFA).
Nagpahayag ang bise presidente nga makahuluya nga pangayuan sang bayad ang Estados Unidos para lang ibalik ang VFA bangud daw kaangay nga nagapangilkil ang Pilipinas.
Subong nga nag-ibwal na si Duterte bangud sa pahayag ni Robredo, nagalaum gihapon ang bise presidente nga may lugar pa ang presidente nga makapamati sa mga suhestyon sang iban nga mga government officials apisar nalakip sila sa grupo sang opposition.
