Suspendihon sang duha ka semana ang operasyon sang Rockwell Cockpit Arena sa Barangay Don Esteban, Lapuz, Iloilo City.
Ini ang kasunod sang paglapas sa protocol sang nasambit nga bulangan sa Resolution No. 103 nga gin-isyu sang Inter-Agency Task Force for the Management of Emerging Infectious Diseases (IATF) sa diin suspendido ang pagpatigayon sang bulang tubtob sa Abril 4 bangud sa pagtaas sang kaso sang COVID-19 sa pungsod.
Sa interview sang Bombo Radyo kay Iloilo City Mayor Jerry Treñas, iya ginpahayag nga base sa rekomendasyon sang City Legal Office, nahisugtan niya nga suspendihon ang operasyon sang Rockwell Cocpit Arena.
Suno kay Treñas, sa tion nga makahimo sang offense sa liwat ang amo nga bulangan, permanente na nga suspendihon ang ila prankisa.
Gin-athag man sang alkalde nga suspension lang anay ang ihatag nga penalidad sa Rockwell Cockpit Arena bangud ila man ginkonsidera nga wala nabaton sang arena ang iya advisory antes ginpatigayon ang bulang.
Matandaan nga ginpatigayon ang bulang sa Rockwell Cockpit Arena sang Marso 22, las 11:00 sang gab-i tubtob las 7:00 sang aga, Marso 23.
