Ginplastar sang Department of Justice (DOJ) executive nga mahimo nga i-subpoena man sang National Bureau of Investigation (NBI) si anay presidente Rodrigo Duterte pareho sa iya bata nga si Vice President Sara Duterte.
Kasunod ini sang iya kontrobersyal nga statement samtang nagalala ang away ni Sara kag sang Marcos administration.
Sa iya late-night press conference subong nga semana, matandaan nga nagpanawagan ang former president sa pulis kag militar nga proteksyunan ang Constitution. Wala ini direkta nga nagpanawagan sang kudeta apang ginsiling sini nga may fracture sa gobyerno subong kag ang military lamang ang makahatag sang solusyon.
Para naman sa Malacañang, katumbas na ini sa paghaylo sa pwersa-militar nga maglunsar sang kudeta para nga masipa-pahalin si Marcos.
Suno kay DOJ Undersecretary Jesse Andres, may posibilidad gid nga ipatawag ang amay nga Duterte bangud ginasunod sang ahensya ang due process. Ginsiling ni Andres nga padayon ang pag-monitor sang NBI sa mga ginapanghambal sang anay presidente.
Sa pihak sini, nagpahayag ang opisyal nga professional mga organisasyon ang Philippine National Police kag Armed Forces of the Philippines kag kumpyansa siya nga indi ang mga ini maghilabot sa civil affairs kag civil governance.
“I know that the Philippine National Police, the Armed Forces of the Philippines is a professional organization and they will never interfere in to civil affairs and civil governance,” suno sa opisyal.
Nahibaluan nga una na nga nagdagdag sang subpoena ang NBI kay Sara bangud sa pahayag sini sa online press conference nga may ginmanduan siya nga KUN may magpatay sa iya, patyon man si President Marcos, First Lady Liza Araneta Marcos, kag Speaker Martin Romualdez.#
