ILOILO CITY – Nakadepende na sa isa ka nagapauli nga residente sa syudad sang Iloilo ang pagpili sa klase sang iya quarantine kun mag-abot sa syudad.
Ini ang pagpaathag ni Mr. Jeck Conlu, COVID-19 team spokesperson sang Iloilo City Government, bangud sang gina-lauman nga pagdamo sang mga locally stranded individuals, returning overseas Filipinos, kag authorized persons outside residence (APORs) nga magabalik sa Iloilo City subong nga holiday season.
Sa interview sang Bombo Radyo kay Conlu, iya ginpahayag nga i-require gid ang swab test sa sini nga mga residente kag nakadepende na sa ila kun mag-home quarantine ukon mag-facility quarantine sa kondisyon nga sundon sang istrikto ang mga protocol.
Sa naka-home quarantine, ginatugyan na sa mga barangay officials ang katungdanan sa regular nga monitoring.
Bangud naga-proseso naman sang swab samples ang Uswag Iloilo City Molecular Laboratory sa San Pedro, Molo, Iloilo City, mahimo na mapagwa ang test results sa sulod sang 24 tubtob 48 ka oras.
Libre ang COVID-19 test apang gin-athag nga para lang ini sa mga taga-syudad sang Iloilo.
