ILOILO CITY – Ginapanan-aw nga masundan pa ang rollback sa presyo sang produktong petrolyo sa masunod nga semana.
Sa una nga tatlo ka adlaw sang trading sa world market, nagdangat sa masobra P3 sa kada litro ang pagnubo sang presyo sang imported nga diesel, gasolina kag kerosene.
Bangud sini, posible nga mataas ang rollback sa masunod nga semana apang ibuhin pa diri ang premium kag ang paghina sang piso kontra dolyar.
Suno kay Oil Industry Management Bureau Director Rino Abad, mataas ang indikasyon nga may yara sang rollback sa masunod nga semana kag mas mataas sa rollback subong nga semana.
Sang Martes, nagnubo sang P3 ang kada litro sang diesel samtang P3.40 naman sa kada litro sang kerosene.
Apang, indi pa siguro suno sa mga eksperto kun sunud-sunod ang rollback sa mga masunod nga semana.
Magadepende pa ini kun lubos pa nga maghina ang demand ukon konsumo sang langis sa mga dalagko nga pungsod.
Dugangan pa sang nagataas man nga presyo sang balaklon kag serbisyo sa bilog nga kalibutan gani nagahina ang demand sang langis kag naganubo man ang presyo sini.
Suno pa kay Abad, posible nga magnubo ini sang P4 tubtob P5.
