Ginkumpirma sang pamunuan sang Traffic Investigation and Enforcement Unit (TIEU) sang Iloilo City Police Office (ICPO) nga limitado ang ila rolyo kun imbestigasyon sa mga aksidente sa dalanon ang istoryahan.
Ini may kaangtanan sa kapaslawan sang mga otoridad nga ipaidalom sa mandatory alcohol and chemical testing si June Paul Valencia, 32 anyos, driver sang Mazda MX5 nga sportscar nga nagbunggo-patay sa mag-asawa nga Joe Marie kag Alnie Dinah Osano sa Senator Benigno Aquino Jr. Avenue, Mandurriao,Iloilo City.
Sa interview sang Bombo Radyo Iloilo kay Lt. Col Efren Lozada, chief sang TIEU, iya ginpahayag nga kutob gid lang sa pagpatigayon sang imbestigasyon sa scene of incident kag pagtipon sang ebidensya para sa pagpasaka sang kaso ang mahimo sang traffic investigator.
Suno kay Lozada, apisar may naga-eksister man nga Republic Act 10586 ukon Anti-Drunk and Drugged Driving Act of 2013 nga nagasilot sa mga driver nga mapamatud-an nga positibo sa alkohol ukon druga samtang nagamaneho, indi man nila ini mapatuman bangud wala sang equipment kaangay sang breath analyzer.
Magluwas diri suno kay Lozada, indi man sila makadali-dali makapatuman sang sini nga layi bangud indi man tanan nga traffic investigators ang deputized sang Land Transportation Office (LTO).
Dugang pa sang natungdan, mangin ang LTO ang wala man naga-implementar nga amo kuntani ang lead agency nga nagaenforce sang nasambit nga layi.
