Ginbali sang Department of Justice (DOJ) ang mga report nga nagasiling nga ginakonsiderar nga mangin state witness si anay House Speaker Martin Romualdez.
Kaangot ini sa nagapadayon nga imbestigasyon natuhoy sa ginareklamo nga mga iregularidad sa flood control projects.
Sa isa ka press briefer, ginsiling sang DOJ nga wala sang legal nga basehan ang amo nga impormasyon. Ginpasiguro sang ahensya nga wala nagpasaka si Romualdez sang aplikasyon agud mangin state witness sa idalum sang Witness Protection, Security and Benefits Program (WPSB).
“The Department of Justice formally denies reports that former Speaker of the House of Representatives Martin Romualdez is currently being considered as a state witness. There is no factual or legal basis to this misinformation,” suno sa bag-o nga DOJ spokesperson nga si Raphael Martinez.
Dugang sini: “As of date, former Speaker Martin Romualdez has not filed an application for state witness with the DOJ.”
Ginpahanumdom man sang departamento sa publiko nga indi magpati sa mga peke kag misleading nga mga pahayag kag dapat nga magsalig lamang sa verified kag opisyal nga impormasyon halin sa DOJ.
“We remind the public to rely on verified and official information coming from the DOJ exclusively. The Department of Justice remain firm and steadfast in our commitment to uphold the rule of law, guided by facts — not politics,” pahayag pa sang DOJ spokesperson.
