Wala nasaksihan sang football fans ang madugay na ginakalangkagan nga liwat nga pag-atubangay sa pitch sang duha ka all-time greatest players nga sanday Lionel Messi sang Argentina kag Christiano Ronaldo sang Portugal.
Ini bangud sa pre-season friendly game sang club ni Messi nga Inter Miami batok sa Al-Nassr nga club ni Ronaldo sa Saudi Arabia kaina gid lamang sa kaagahon, Pebrero 2 (oras sa Pilipinas), wala nakahampang si Ronaldo bangud sa injury.
Ginbangko man si Messi sa masobra isa ka oras kag ginpasulod lamang sa hampang sang ika-83 nga minuto na sang match.
Apisar pa nga nakasulod na si Messi, wala na sini nga nasapar nga luwason ang Inter Miami nga wala gid naka-skor sa bilog nga hampang.
6-0 ang skor kun sa diin tatlo ang goals sang Al Nassr sa first half kag tatlo man sa second half.
Kabahin ini sang Riyadh Season Cup kag isa ka friendly match apang nangin intense sa imbukada pa lamang rason nga tatlo gid ka players ang ginpaguwa-an sang yellow cards bangud sang kumprontasyon sa tunga sang field.
Tatlo na ka pre-season games nga sunod-sunod ang kalutusan sang Miami. Ang nauna amo anga 4-3 nga kahuy-anan sa kamot sang Al-Hilal kag ang 1-0 reverse batok sa FC Dallas. Sunod nga atubangon sang American club ang team sang Hong Kong sa isa man ka friendly game.
Ang Al Nassr – nga palapit na sa mid-season break – ang maga-atubang sa Al-Hilal sa masunod nga semana.
LAST DANCE KUNTANI
Ini kuntani ang ginalantaw sang fans nga Last Dance kun sa diin atubangay sanday Ronaldo kag Messi.
Kilala ang duha bilang pinakadaku nga magkasumpong sa football sa sulod sang masobra isa na ka dekada — una nga nagsambuwa sang 2008 sang ginlutos sang Manchester United ang Barcelona sa Champions League semi-finals kag nasundan pa sang 34 ka mga okasyon kun sa diin 16 ka beses nga nagdaog ang Argentine star, 10 ka beses ang Portuguese star, kag siyam ang nagtapos sa draw.
Sa prestihiyoso nga Ballon d’Or awards, walo ang gina-uyatan sang 36-anyos nga si Messi samtang may lima naman ang iya 38-anyos nga Portuguese opponent.
Matapos nakadaog sa World Cup sa Qatar sang 2022, naghalin si Messi sa French club nga Paris Saint-Germain (PSG), nagsaylo sa Inter-Miami — indi daku nga team sa Estados Unidos sang Amerika — apang natigayon nga nakadaog sa Leagues Cup nga amo ang labing-una nga tropeo sang club.
Si Ronaldo naman ang nagpirma sa Al-Nassr sang Saudi Pro League matapos nga nagbiya ini sa Manchester United.
Matandaan nga sini nga 2023, nakaatubangay man sanday Messi kag Ronaldo sa friendly match sa Saudi Pro League XI. #
