Padayon pa nga gina-imbestigaran sang Quezon City Police District (QCPD) ang makakilibot nga kamatayon sang 76-anyos nga beterano nga aktor nga si Ronaldo Valdez ukon si James Ronald Dulaca Gibbs sa matuod nga kabuhi.
Nagpangabay man ang pulis sa publiko nga likawan anay ang pag-himo himo sang istorya kaangot sa ginkamatay sang aktor samtang nga wala pa natapos ang pagpangusisa sang otoridad.
Si Janno Gibbs nga anak ni Valdez ang nagkumpirma man sa kamatayon sang iya amay, apang wala man sang ginhatag nga rason. Sa baylo, naghingyo ini sa publiko nga tahuron anay ang ila nga privacy.
Suno naman kay Police Major DonDon Llapitan nga hepe sang QCPD-Criminal Investigation and Detection Unit, base sa inisyal nga impormasyon, pasado las tres sang hapon sang Domingo sang nakit-an ang aktor sa sulod sang iya kuwarto sa ila balay sa Casa Nueva Homes, Manga Street, New Manila, Quezon City. Ginpahayag nga nagapungko ini sa bangko, duguon, kag may gina-uyatan nga pusil.
Gindalagan pa ini sa pinakamalapit nga ospital apang gin-deklarar nga dead on arrival.
Bangud may involved nga pusil sa crime scene, ginpaidalom sa paraffin test ang tanan nga kaupod ni Ronaldo sa ila nga balay bilang kabahin sang standard operating procedure (SOP) sa kaangay nga mga insidente.
Sa subong, ginahulat pa ang resulta sang paraffin kag ballistic tests. Nagpahayag ang QCPD nga isapubliko sini ang mangin resulta sang ila nga imbestigasyon.
Popular si Valdez sa Philippine show business bangud sa halos anum ka dekada nga karera sini sa acting kag katapusan nga nakit-an sa romantic drama series nga “2 Good 2 Be True” nga ginbidahan sang former couple nga sanday Daniel Padilla kag Kathryn Bernardo.
Popular man siya sa iya papel sa mga pelikula nga “May Minamahal”, “The Mistress”, “Seven Sundays”, “Cedie”, “The Flor Contemplacion Story”, kag series kaangay sang Mula Sa Puso, FPJ’s Ang Probinsyano, kag I Love Betty La Fea.#
