Nagpasaka sang panumbungon nga inciting to sedition ang National Bureau of Investigation batok kay former presidential spokesperson Harry Roque kag vlogger nga si Claire “Maharlika” Contreras may kaangtanan sa ginbansagan nga “polvoron” video.
Hulyo sang 2024 pa lang sang ginsiling sang NBI nga ang forensic analysis nga nagapakita sang lalaki nga nagagamit sang druga sa video ang indi si Presidente Ferdinand “Bongbong” Marcos Jr.
Si Maharlika ang nagapangatubang man sang charges bangud sa unlawful use of means of publication and unlawful utterances, cyber libel, kag computer-related forgery.
Matandaan nga sang Abril 9, gin-angot sang vlogger nga si “Pebbles” Cunanan si Roque sa pagpalapta sang “polvoron” video.
Bilang sabat, ginsiling ni Palace Press Officer Undersecretary Atty. Claire Castro nga wala sang bag-o sa amo nga alegasyon.
Sa Facebook, ginsiling ni Roque nga gina-welcome niya ang complaint nga ginpasaka sang NBI.
Suno kay Roque, maayo nga oportunidad ini para kay President Ferdinand Marcos, Jr. nga personal nga mapamatud-an sa korte kun indi gid man matuod ang alegasyon tuhoy sa iya paggamit sang cocaine kag iya addiction.
Dugang niya, ang affidavit kag testimoniya ni Pebbles Talakera sa House of Representatives TriComm hearing ang lunsay wala sang kamatuoran.
Si Roque ang yara subong sa Netherlands para mag-apply sang asylum sa tunga sang arrest warrant nga gin-isyu batok sa iya sang House Quad Committee may kaangtanan sa probe sa Philippine offshore gaming operators (POGOs).
