Ginpahayag sang Bureau of Immigration (BI) nga mahimo ipaidalom sa watchlist sang International Criminal Police Organization ukon Interpol si former Duterte spokesperson Harry Roque.
Ini sa tion nga mag-isyu ang korte sang warrant para sa pag-aresto sa iya.
Matandaan nga nagtuhaw si Roque sa The Hague sa Netherlands sa pihak sang standing arrest warrant para sa iya sa House of Representatives bangud sa pag-absent sa inquiry angot sa Philippine offshore gaming operators.
Si Roque ang gin-akusahan nga naangot sa operasyons sang offshore gaming hub sa Porac, Pampanga nga gin-raid sang nagligad nga tuig bangud sa iligal nga aktibidad.
Si Roque ang ginakabig man nga fugitive sang kamara.
Suno kay Dana Sandoval, spokesperson sang BI, samtang ang House may yara sang detention order batok kay Roque, kinahanglan gihapon sang court-issued warrant agud ipaidalom sa radar sang Interpol.
Ang Interpol amo man ang nagserbe sang International Criminal Court warrant kay former President Rodrigo Duterte.
Si Duterte ang detained subong sa ICC detention facility sa Scheveningen sa Netherlands agud atubangon ang crime against humanity charges nga naangot sa iya maduguon nga drug war.
