Gin-report sang Armed Forces of the Philippines (AFP) nga nangin madinalag-on ang routine troop rotation and resupply (RORE) mission nga ginpatigayon sini sa BRP Sierra Madre sa Ayungin Shoal kadungan sang Day of Valor.
Suno sa militar, ginhimo ang misyon nga may koordinasyon sa Philippine Coast Guard (PCG).
Kadungan sang Araw ng Kagitingan kahapon, Abril 9, ginkilala man sang AFP ang dedikasyon kag kaisog sang mga soldado sa BRP Sierra Madre nga amo ang nagabantay sa West Philippine Sea para masiguro nga wala sang makalapak ukon makaagaw sa sovereign rights kag national interest sang Pilipinas.
Ini nga RORE ang ikapito na nga resupply mission nga wala sang “untoward incidents” halin sang Hulyo sang nagligad nga tuig.
Ang iban pa ang ginpatigayon sang July 27, 2024; Sept. 26, 2024; Nov. 14, 2024; Dec. 12, 2024; Jan. 24, 2025; kag March 4, 2025.
Antes sini, ang pagdul-ong sang suplay sa amo nga barko sa West Philippine Sea ang nagapasaka sang tension sa tunga sang Pilipinas kag China.
Sang Hunyo 7, 2024, nasaksihan ang ginakabig pinaka-agresibo nga pagpang-harass sang China nga nag-resulta sa pagka-utod sang tudlo sang isa ka soldado sang Pilipinas. Kasunod sadto, may yara sang Bilateral Consultation Mechanism (BCM) nga ginkasugtan sa tunga sang Manila kag Beijing kaangot sa resupply activity.
