ILOILO CITY – Nagapanguna sa gihapon sa mga mabakal nga bulak amo ang Rosas may kaangtanan sa pagsaulog sang Valentine’s Day.
Sa interview sang Bombo Radyo kay Christy Tamorete, manugbaligya sang bulak sa Iloilo Central Market, iya ginpahayag nga ang Rosas nga pula ang mabakal sa tagsa ka Valentine’s Day.
Suno kay Tamorete, nakadepende naman sa sahi sang bulak kag sa disensyo ang presyo sini.
Ang isa ka bilog nga Rosas nga na putos ang nagabalor sang P100 samtang P80 naman ang wala naputos kag nagabili naman sang P300 ang isa ka set ukon tatlo ka bilog nga Rosas.
Kun bouquet naman sang sunflower ang pagahambalan, nagabalor ini sang P500 samtang P250 naman ang kada bilog sang sunflower.
Nagalab-ot naman sa P1,500 ang bili sang isa ka dosena nga rosas kag may chololate samtang ang anum ka bilog ukon isa ka bouquet sang blue rose ang nagabalor naman sang P2,500.
Ang isa ka bouquet suno kay Tamorete ang may yara na sang disenyo kag may yara na sang Valentine Card.
Kun ipaanggid naman sa nakaligad nga tuig, ginpahayag sang natungdan nga mas naghina ang baklanay sang bulak subong nga tuig.
