Nag-qualify na ang Filipino weightlifter nga si Rosegie Ramos para sa 2024 Paris Olympics.
Siya ang ika-pito sa Pilipinas nga nakaangkon sang ticket para sa Olympiada subong nga tuig kag una naman halin sa weightlifting team.
Nahimo ini sang 20-anyos nga Pinay matapos nagpangibabaw sa women’s 49kg Group B sa 2024 IWF World Cup sa Thailand nga amo ang katapusan nga qualifying event para sa Paris Summer Games.
Nahakwat sini ang 87kgs sa snatch kag 103kgs sa clean and jerk nga may kabug-usan nga 190kg kag amo ang nahingadlan nga best athlete sa amo nga kategorya.
Si Ramos ang pakaisa sang weightlifting icon kag labing-una nga Olympic gold medalist sang Pilipinas nga si Hidilyn Diaz nga yara man subong sa Thailand para mag-compete.
Madugay na ini nga myembro sang national team nga nakabulsa na sang madamo nga medalya sa regional kag continental events kaangay sang gold sa 2022 kag 2023 editions sang Asian Junior Championships. Nakadaog man ini sang bronze medal sa Southeast Asian Games sang 2021.
Antes kay Ramos, una na nga nangin kuwalipikado para sa Olympiada sa France ang Filipino athletes nga sanday EJ Obiena sa pole vault; Carlos Yulo kag Aleah Finnegan sa gymnastics; kag Eumir Marcial, Nesthy Petecio, kag Aira Villegas sa boxing.
