ILOILO CITY – Daku ang pagsalig sang empleyado sang Iloilo City Hall nga si Rosita Camacho kay Presidente Rodrigo Duterte rason nga nagdangop siya sa Digong 8888 Hotline nga isa ka programa sa People’s Television Network sa diin nagaserbe nga host si Presidential Spokesperson Atty. Salvador Panelo.
Ini ang may kaangtanan sa ginapahayag pagwaslik-poder ni Iloilo City Mayor Jerry Treñas sa ginabanta 15 ka empleyado sang Iloilo City Hall nga nagsuporta sa kandidatura ni anay Mayor Jose Espinosa III.
Sa interview sang Bombo Radyo kay Camacho, Special Operations Officer 3 sa Iloilo City Hall, iya ginpahayag nga wala na siya sang may madangpan magluwas lang sa pagreklamo kag pagpasa sang sulat kay Presidente Duterte.
Suno kay Camacho, ultimo lamang siya nga empleyado sang Iloilo City Hall kag wala sang inugbato kay Treñas.
Ginpahayag ni Camacho nga iya inisyatibo ang pagpadulong sa Metro Manila agud nga magpangayo sang bulig sa Digong 8888 Hotline kag wala diri sang ihibalo ang iya mga kaupod nga empleyado.
Kun sa Iloilo City Hall lang suno sa natungdan, indi mangin patas ang imbestigasyon bangud nga si Treñas ang nagaserbe nga pinakamataas nga opisyal.
Nagpabutyag naman sang kahandaan si Camacho sa pag-atubang sa mga kaso nga ginpasaka batok sa iya.
Nahibalu-an nga nag-ugat ang tanan tuhoy sa ginapahayag pagserbe nga bagwoman kag pagsuporta ni Camacho sa kandidatura ni Espinosa.
Ang nasambit nga akusasyon ang ginpanginwala naman ni Camacho kag sa baylo, iya nga ginpasakaan sang kaso kag gin-akusaran si Treñas kag tatlo pa ka empleyado sang Iloilo City Hall nga nagawaslik-poder paagi sa pagpilit sa iya nga mag-leave sa sulod sang anum ka bulan.
