ILOILO CITY – 30 ka mga beneficiary ang maka-agum sang libre nga removable partial dentures sa Bombo Medico 2019 nga patigayunon sa Hulyo 14 sa Iloilo Science and Technology University (ISATU).
Sa interview sang Bombo Radyo kay Dr. Max Magallanes, miyembro sang Rotary Club – Iloilo South kag miyembro man sang Iloilo Doctor’s College-College of Dentistry, iya ginpahayag nga removable partial dentures ang ila igahatag agud nga mas madali nga mapuslan sang mga beneficiary ipaanggid sa full dentures.
Sa Hulyo 14 suno kay Dr. Magallanes, may yara sang screening nga patigayunon kag sa Hulyo 25, mahimo na nga magamit sang mga beneficiary ang postiso.
Tinguhaan man sang grupo nga masobra pa sa 30 ka mga beneficiary ang maka-agum sang libre nga postiso paagi sa Bombo Medico 2019.
Samtang, bugal naman para kay Dr. Eva Jaena, Presidente sang Rotary Club-Iloilo South, nga makabulig sa mas madamu nga tawo paagi sa Bombo Medcio.
Magluwas sa postiso, ginpahayag man ni Dr. Jaena nga magahatag man ang ila grupo sang mga eye glasses kag assistive device kasubong sang sungkod, wheelchair kag walker.
