Ginpagwa na sang Rotary Club of Iloilo City ang resulta sang Boys and Girls Week Celebration 2026 nga ginhiwat Oktubre 19 tubtob 25, 2026, nga naghatag sang oportunidad sa mga kabataan nga maeksperyensyahan ang pagpanguna sa nagkalain-lain nga opisina sang gobyerno kag pribado nga sektor.
Base sa listahan, may 53 ka kabataan nga napili nga magrepresentar sa nagkalain-lain nga eskwelahan kag magaserbe nga counterpart sang mga posisyon sang mga opisyal, lakip na ang mayor, vice mayor, mga konsehal, kag mga head sang nagkalain-lain nga departamento sang Iloilo City Government sa sulod sang isa ka semana.
Bangud sini, si Alexa Agal Bataan sang University of the Philippines Visayas- Iloilo ang mangin counterpart ni Mayor Raisa Treñas, samtang si Izabella Margaret D. Dimla sang Hua Siong College of Iloilo–Ledesco ang ang magaserbe counterpart ni Vice Mayor Lady Julie Grace “Love-love” Baronda.
May mga kabataan man nga gin-assign sa mga opisina sang Iloilo City Government, lakip ang City Administrator, City Legal Office, City Planning and Development Office, City Health Office, kag iban pa nga ahensya.
Dugang pa, ginturn-over man ni Mayor Treñas ang “key of responsibility” kay Bataan bilang simbulo sang pagpasa sang mga katungdanan kag pagsalig sang Iloilo City Government.
Sa pihak nga bahin, may mga kabataan man nga magaserbisyo sa mga opisina sang pribado nga sektor kag magrepresentar sa nagkalain-lain nga eskwelahan sa siyudad.
Ang aktibidad kabahin sang tuigan nga Boys and Girls Week Celebration sang Rotary Club of Iloilo City, nga nagatinguha nga mapalapad ang paghangop sang mga kabataan sa pagpanguna, responsibilidad kag pagserbisyo publiko paagi sa aktuwal nga pag-eksperyensya sa mga katungdanan sang mga opisyal.
Text By: Bombo Cyrene A. Nasis
