Ginalauman nga makaguwa na subong nga adlaw sa ospital ang tanan nga mga Reserve Officers’ Training Corps (ROTC) cadets nga na-confine matapos nagsakit ang tiyan sa Camp Adriano D. Hernandez sa Dingle, Iloilo kahapon nga adlaw, Hunyo 17.
Sa interview sang Bombo Radyo kay Col. Edralin Poblete, Group Commander sang Reserve Command VI, Camp Hernandez Dingle, Iloilo, iya ginpahayag nga padayon ang pagpa-ayo sang mga kadete kag ginapaabot nga makapauli na ang tanan nga ginpangdala sa ospital.
Base sa pinakaulihi nga datos, nadugangan pa sang tatlo ang numero sang mga naapektuhan, gani naglab-ot na sa 92 ang kabug-usan nga gindala sa ospital.
Sa sini nga numero, 74 ang ginbulong sa Pototan District Hospital, samtang ang 13 nga gindala sa Barotac Nuevo District Ospital ang tanan naman ang naka-discharge.
Nagpanawagan man si Poblete sa publiko nga indi magpalapta sang sala nga impormasyon samtang ginapadayon ang imbestigasyon sang insidente.
Apang sa inisyal nga pagpangusisa, ang pork adobo ang ginasuspetsahan nga ginhalinan sang pagsakit sang tiyan sang mga kadete.
Dugang pa ni Poblete, may baho na ang baboy nga ginluto gani isa ini sa mga ginatan-aw nga posible nga nagresulta sa food poisoning.
Padayon pa ang imbestigasyon sang mga otoridad kag sang mga health personnel agud makumpirmar ang ginhalinan sang insidente kag malikawan nga matabo ini liwat sa masunod nga mga military training activities.
