Nagpalab-ot sang mensahe si Roy Yanson presidente sang Yanson Group of Bus Companies sa iya iloy nga si Olivia Villaflores Yanson.
Sa interview sang Bombo Radyo kay Yanson, iya ginpahayag nga nagahingyo siya sang bulig sa iya iloy agud mahatagan sang solusyon ang problema sa tunga niya kag sang iya mga utod.
Suno kay Yanson wala na sang iban pa nga makahitso sang indi pag-intindihanay nila nga mag-utod kundi ang ila lang nga iloy.
Nahibaluan nga makapila na nga nagbalik si Presidente Rodrigo Duterte sa Bacolod nga close friend sang pamilya kag iya gintinguhaan nga mahitso ang gamo sa tunga sang mag-utod kag sang pamilya Yanson.
Ini ang may kaangtanan sa padayon nga pagtaas sang tensyon sa tunga sang mag-ululutod sa diin ginabalabagan sang matriarch sang pamilya ang pagpungko sang iya anak nga si Roy Yanson sa pagka presidente sang kompaniya bangud suno sa iya ilegal ini kag wala ginpaagi sa insakto nga proseso.
Madumduman nga ginpahalin sang apat ka mag-ululutod nga Roy, Maria Celina, Emily kag Ricky ang ila manghod nga si Leo Rey sa pagka-presidente sang kompaniya kag ginbulos si Roy Yanson.
Wala man napunggan ni Roy nga magpabutyag sang kalain sang buot sa iya iloy bangud suno sa iya indi patas ang pagtrato sini sa ila nga mag-ululutod.
Dugang pa ni Yanson, apisar sa indi patas nga pagtrato nga iya nabaton halin sa iya iloy indi sa gihapon madula ang iya pagrespeto kag pagpalangga diri.
