𝗜𝗟𝗢𝗜𝗟𝗢 𝗖𝗜𝗧𝗬 – Nagapati ang grupo sang mga abogado nga madamo pa ang dapat nga ikonsiderar agud mangin state witness si retired police officer Royina Garma kaangot sa extrajudicial killings sa idalom sang administrasyon ni anay Presidente Rodrigo Duterte.
Si Garma ang pinakauna nga babaye nga nangin direktor sang Criminal Investigation and Detection Group (CIDG) sa Central Visayas kag tuig 2019 naman sang gin-appoint siya ni Duterte bilang general manager sang Philippine Charity Sweepstakes Office matapos nagretirosa Philippine National Police (PNP).
Sa interview sang Bombo Radyo kay Atty. Joebert Pahilga, founding member sang National Union of People’s Lawyers (NUPL), iya ginpahayag nga nakadepende pa ini sa desisyon sang Department of Justice (DOJ).
Suno kay Pahilga, tun-an pa ang mga ipasa nga affidavit ni Garma agud matumod kun bala mahimo siya nga mangin state witness.
Nagakadapat man suno sa natungdan nga indi mangin ‘most guilty’ si Garma sa imbestigasyon sa extrajudicial killings.
Una na nga nag-atubang si Garma sa imbestigasyon sang Quad Committee kaangot sa nangin papel sini sa natabo nga pagpatay kay anay Iloilo City Police Office Director kag Philippine Charity Sweepstakes Office (PCSO) board secretary Atty. Wesley Barayuga.
Nagwa man ang pangalan ni Garma sa pagpatay sa tatlo ka mga Chinese drug lords sang 2016 sa Davao Penal Colony.
Sa hearing sang komitiba, ginbulgar ni Garma ang nangin sistema sa war on drugs sang Duterte administration nga may yara sang reward system sa mga mapatay nga drug personality nga nagadangat sa P20,000 tubtob sa P1 million.
