ILOILO – Ginkumpirma sang Revolutionary Proletarian Army- Alex Bongcayao Brigade (RPA-ABB) Nilo Dela Cruz Group nga sila ang gin-ambush sang katapo sang New People’s Army (NPA) sa Sitio Cunla, Brgy. Cunsad Alimodian Iloilo subong nga adlaw, Enero 15.
Sa interview sang Bombo Radyo kay Ka Rolly, isa sa mga miyembro sang amo nga grupo, iya ginpahayag nga ini ang ikaduha nga bes nga natabo ang ambush.
Ang una ang natabo sang nagligad nga Enero 12 sa diin isa ka miyembro sang ila grupo ang napilasan kag may mga report nga may yara sang napilasan sa bahin sang NPA.
Sa amo nga tion, pahayag ni Ka Rolly, nagikan ang ila grupo sa Brgy. Camia, San Joaquin, Iloilo sa diin ginrequest sila sang barangay nga mag-mintinar sang kalinong.
Apang, suno sa natungdan, gin-ambush sila sang ginabanta 30 ka mga miembro sang NPA apang madasig man sila nga nakabalos rason nga nag-ampo ang mga kasumpong.
Kaina sang aga, suno kay Ka Rolly, gin-request man sila sang Brgy. Cunsad nga magmintinar sang kalinong sa lugar kadungan sang kapistahan.
Samtang pakadto ang ginabanta 20 ka miyembro sang ila grupo sa lugar, ginpahayag ni Ka Rolly nga ginpalukpan sila sang landmine kag pagkatapos, may yara na sang exchange of fires batok sa ginabanta 30 ka miyembro sang NPA.
Suno kay Ka Rolly, ang rason sang pag-ambush sa ila amo nga gusto sang NPA nga kuhaon ukon agawon ang mga barangay nga ginaprotektahan sang RPA-ABB.
Nahibaluan nga bangud nagapadayon pa ang negosasyon sa tunga sang Nilo Dela Cruz Group kag gobyerno, may yara sa provision sa peace talk nga pwede sila maka-maintain sang peace and order sa isa ka lugar.
