ILOILO – Igadonar na lang sang Iloilo Provincial Government ang RT-PCR machine kag RNA extraction machine nga una nga ginpahulam sa Western Visayas Medical Center Subnational Laboratory.
Sa interview sang Bombo Radyo kay Governor Arthur Defensor Jr., iya ginpahayag nga ang nasambit nga machines ang para kun tani sa Iloilo Provincial Hospital sa banwa sang Pototan apang ini ang ginpahulam sa Subnational Laboratory para mapadasig ang pagproseso sang specimen kag mapadasig ang pagpaguwa sang COVID-19 test results.
Suno kay Defensor, nagabalor sang P1.9 million ang mga machines kag agud nga indi na masulit ang backlogs, iya nadesisyunan nga idonar na lang ini sa nasambit nga hospital.
Ginpahayag ni Defensor nga magabakal na lang sang RT-PCR machine kag RNA extraction machine ang Iloilo Provincial Government sa tion nga matapos na ang COVID-19 laboratory sa Iloilo Provincial Hospital.
