ILOILO – Indi required ang negatibo nga resuta nga RT-PCR test antes batunon sa hospital ang mga manugbata nga iloy.
Ini ang gin-athag ni Dr. Jessie Glen Alonsabe, pinuno sang Regional Epidemiology and Surveillance Unit sang Department of Health Region 6.
Sa interview sang Bombo Radyo kay Alonsabe, iya ginpahayag nga ang RT-PCR test results ang kinahanglan lamang sa tion nga i-require sang doktor kag kun ginakabig nga suspected COVID-19 positive ang pasyente.
Suno kay Alonsabe, ang tanan nga birthing center ang mahimo nga magbaton sang Non-COVID-19 patients samtang ang mga may mild condition ukon asymptomatic ang dapat nga pagadal-on na sa level 1 nga mga hospital.
Ang mga manugbata nga yara sa critical condition ukon high risk ang pagadal-on na sa level 2 kag level 3 nga mga hospital.
Kun may yara sang reklamo, ginpahayag ni Alonsabe nga indi man makapatigayon sang motu propio investigation ang Department of Health kun wala sang legal nga basehan kasubong sang formal complaint.
