ILOILO CITY – Ginkondenar sang Regional Task Force to End Local Communist Armed Conflict sa Western Visayas ang natabo nga encounter sa tunga sang Antique Mobile Force Company kag San Remigio Municipal Police Station batok sa ginapasuni mga miyembro sang Communist Terrorist Group sa Sitio Gahit, Barangay Aningalan, San Remigio, Antique.
Matandaan nga ang engkwentro ang natabo sang Disyembre 11 kun sa diin ginapahayag 16 ka mga katapo sang rebelde ang naka-engkwentro sang kapulisan.
Sa interview sang Bombo Radyo kay Prosecutor Flosemer Chris Gonzales, spokesperson sang Regional Task Force to End Local Communist Armed Conflict, iya ginpahayag nga masami nga target sang mga rebelde amo ang mga government projects sa hinterland areas.
Suno pa kay Prosecutor Gonzales, gusto lamang sang mga rebelde nga ipakita nga mabaskog pa sila apisar nga suno sa iya, nagahina na sila subong.
Dugang pa niya, ang natabo nga encounter ang indi makapugong sa gobyerno nga magpatuman sang mga proyekto sa malayo nga mga lugar.
Ginalantaw man niya nga posible may kaangtanan ini sa ika-54 nga anibersaryo sang Communist Party of the Philippines sa Disyembre 26 ang natabo nga encounter.
