ILOILO CITY – Nagpaguwa sang resolusyon ang Regional Inter-Agency Task Force kag ang Regional Task Force may kaangtanan sa interim guidelines para sa pagpauli sang Returning Overseas Filipinos sa Western Visayas.
Santo sa Resolution no. 35 series of 2020 nga napetsahan sang Setyembre 7, nakasaad nga ang tanan nga Returning Overseas Filipinos nga nakatapos sang 14-day mandatory quarantine kag may negative result sang Reverse Transcription Polymerase Chain Reaction (RT-PCR) test gikan sa port of entry ang nagakadapat nga i-transport deretso sa ila tagsa ka mga lugar. Ang mga Returning Overseas Filipinos ang nagakadapat nga yara sa maayo nga kondisyon kag may nagakaigo nga dukomento gikan sa appropriate agencies ang indi na kinahanglan nga ipaidalom sa RT-PCR test apang sila ang iga-monitor sang Barangay Health Emergency Response Team sa ila balay tubtub makumpirma nga wala sila sang sintomas sang COVID-19.
Ang mga Returning Overseas Filipinos naman nga may negative nga RT-PCR test results apang wala nakatapos sang 14-day mandatory quarantine gikan sa port of entry ang kinahanglan nga magpaidalom sa quarantine sa identified facility sang Local Government Unit. Magapatigayon lamang sang re-swabbing sa tion nga makitaan sang sintomas sang COVID-19 ang Returning Overseas Filipinos kag mahimo na nga makapauli sa tion nga mahatagan sang clearance sang doktor nga gin-designate sang Department of Health. Sa tion nga makapauli sa balay, sila ang iga-monitor sang Barangay Health Emergency Response Team tubtub makumpirma nga wala sila sang sintomas sang COVID-19.
Para naman sa mga Returning Overseas Filipinos nga wala nakatapos sang 14-day mandatory quarantine kag wala pa sang may gina-uyatan nga negative RT-PCR test result ang kinahanglan nga magpaidalom sa quarantine kag sa RT-PCR test pag-abot sa ila tagsa ka lugar.
Ang tanan nga receiving Local Government Unit ang dapat nga maghatag sang transportasyon para sa Returning Overseas Filipinos sa pagsugat gikan sa airport ukon sa seaport tubtub sa pauli-an nga balay. Ang tanan nga driver kag plate number sang designated vehicles ang kinahanglan nga ipahibalo sa Regional Task Force para sa matalunsay nga disembarkation kag dispatch operation.
