ILOILO CITY – Ginahulat pa sang Regional Task Force on COVID-19 ang official release gikan sa national level tuhoy sa ginaduso nga pagpasirado sang mga patyo umpisa Oktubre 30-Nobyembre 2 agud nga malimitahan ang local transmission sang COVID-19.
Sa interview sang Bombo Radyo kay Ma. Aletha Nogra, pinuno sang Office of Civil Defense-Western Visayas Disaster Risk Reduction Management Division kag spokesperson sang Regional Task Force on COVID-19, iya ginpahayag nga sila sa regional level ang wala pa nakasapol may kaangtanan sa nasambit nga mandu.
Suno kay Nogra, sa tion nga may yara na sang memorandum gikan sa national level, magasapol sila sa regional level kun paano ini mapatuman sang husto kag kun paano ini mapahangop sa publiko.
May kaangtanan diri, ginpahayag ni Nogra nga may natukod naman nga Management Team ang Regional Task Force.
