“Kung indi ini pagtutukan, mahimo nga kriminal ang mga kabataan,” ini ang nangin pahayag ni Spox Joy Fantilaga-Gorzal sa exclusive interview matapos ang emergency meeting ni Mayor Raisa Treñas kaupod ang mga opisyal sang Iloilo City Police Office, City Social Welfare and Development Office, Public Safety and Transportation Management Office kag Department of Education bangud sa sunod-sunod nga rumble sang mga pamatan-on sa siyudad, nga ginakabig sang alkalde nga seryoso kag delikado nga isyu.
Sa interview sang Bombo Radyo kay Joy Fantilaga-Gorzal, tagpamaba sang alkalde, ginpahayag sini nga bisan may iban pa nga naka-iskedyul si Mayor, ginpauna gid niya ang pagpatawag sang meeting bangud ginakabig ini nga “alarming.”
Suno kay Gorzal, ginare-activate na liwat sang lokal nga gobyerno ang Batang Pandilla Program, kag ginapasangkad ang mga preventive lectures sa mga ‘big campuses’ pareho sang Iloilo City National High School, Fort San Pedro, kag Ramon Avanceña National High School agud mapunggan ang gang recruitment.
Ginmanduan man sang alkalde ang City Social Welfare and Development Office nga magsumiter sang updated action plan nga basehan sang interbensyon.
Ginpanugyan man sini nga dapat may holistic approach, kag indi lang responsabilidad sang Iloilo City Government kundi kinahanglan may partisipasyon man ang mga ginikanan, mga barangay kag stakeholders.
Kabahin man sang plano ang pagbutang sang satellite police stations sa mga pampubliko nga lugar para malikawan ang pagdamo sang gang groups.
Suno pa kay Fantilaga-Gorzal, “Kung indi ini pagtutukan, mahimo nga criminal ang mga kabataan. Indi na kita maghulat nga may mapatay kag may mapilasan.”
