ILOILO CITY – Health issue ang rason ni Iloilo City Councilor Alan Zaldivar kun nga-a iya ginduso nga ipaiway anay ang RUN for Jesus 2020 nga event sang isa ka Christian Organization.
Sa interview sang Bombo Radyo kay Zaldivar nga chairman sang Committee on Health, iya ginpahayag nga sa ginpatigayon nga session, isa sa mga agenda amo ang ginhingyo nga road closure para sa RUN for Jesus 2020 nga patigayunon sa Pebrero 27 sa La Paz Plaza Football Field, umpisa 5:00 sa hapon tubtub 9:00 sa gab-i.
Suno kay Zaldivar, bangud nga ginalauman nga magalab-ot sa 20,000 tubtub 30,000 ang magatambong sa nasambit nga religious activity, indi madula ang kahangawa nga mahimo maglapta ang Coronavirus Disease 2019 (COVID)-19 ilabi pa nga may Koreans man nga magatambong sa nasambit nga event kun sa diin mangin dinapit nga bisita si Sen. Manny Pacquiao.
Ginpahayag ni Zaldivar nga sa South Korea, nagadamo ang numero sang pasyente nga nagpositibo sa nasambit nga virus rason nga kinahanglan anay nga ipaidalom sa quarantine ang Koreans nga nagapadulong sa pungsod.
Bilang lihok sa pagtapna sang outbreak, ginkansela sang Iloilo City Government ang pagpatigayon sang Paraw Regatta Festival.
