ILOILO CITY- Ginmando sang korte sa Moscow ang pag-aresto kay Yulia Navalnaya, ang asawa sang napatay nga Russian opposition politician nga si Alexey Navalny nga mainit nga kritiko ni President Vladimir Putin.
Ini matapos gin-akusahan sang Basmannyy District Court sa Moscow si Navalnaya sang partisipasyon sa isa ka extremist organization.
Ang bana ni Yulia nga si Alexey Navalny ang napatay sang Pebrero 16 sa penal colony sa Siberia kun sa diin ginaserbehan niya ang 19-anyos nga sentensiya matapos mapamatud-an nga guilty sa pagtukod sang isa ka extremist community, nga naga- finance sang extremist activists kag pila ka mga krimen.
Si Navalny ang highest-profile opposition leader sa Russia kag tinuig nga ginapakamalaot si Putin nga malapit sa 25 ka tuig na nga yara sa poder.
Gin-akusahan ni Yulia si Russian President Vladimir Putin nga amo ang responsable sa kamatayon sang iya bana.
Ginsiling man sini nga gintago sang Russian authorities ang lawas ni Navalny sa katuyuan nga matago man ang kabangdanan sang kamatayon sini.
Hugot naman nga ginpanginwala sang Kremlin ang alegasyon tuhoy sa kahilabtanan sini sa kamatayon ni Navalny.
