Ginpasibangdan sang Britanya ang Russia nga nagagamit sang troll factory agud nga magpalapta sang sala nga impormasyon sa social media may kaangtanan sa gyera sa Ukraine kag agud nga atakehon ang pila sa ila nga mga kritiko.
Suno sa research nga ginpondohan sang gobyerno sang United Kingdom, may yara sang daan nga factory sa Saint Petersburg kag amo ini ang ginhimo sang Russia nga troll farm.
Ginpahayag nga gingamit ini nga troll farm agud nga magbilin sang mga komento sa mga comment sections sang popular websites.
Suno sa defense ministry sang Britanya, gina-target sang mga empleyado sang troll factory ang politicians amo man ang musicians kag bands sa Britain, South Africa kag India.
Lakip sa gin-target sang trolls suno sa UK amo ang accounts nanday British Prime Minister Boris Johnson kag iban pa nga UK ministers, kag iban pa nga world leaders kaangay ni German Chancellor Olaf Scholz kag EU foreign policy chief Josep Borrell.
Ang operasyon sang trolls ang ginapahayag nga na-detect na pati sa Telegram, Twitter kag Facebook, apang mas labi nga naka-sentro sa Instagram, YouTube, kag TikTok.
Ginapahayag pa nga may yara sang mga TikTok influencers nga ginbayaran agud nga pabaskugon pa kun ano ang ginaduhol nga istorya sang Russia. ##
