Nagapanindugan ang Russia nga sarang sini nga ma-kontrol ang mayor nga mga syudad sa Ukraine kag may bastante ini nga pwersa militar kag wala ini nagakinahanglan sang bulig halin sa China.
Suno kay Kremlin spokesperson Dmitry Peskov, indi matuod ang pahayag sang mga opisyal sa Estados Unidos nga naghingyo ang Russia sang bulig sa China para sa ila nga military equipment.
Pahayag sang Kremlin, may yara sang independent nga potensyal ang Russia nga makapadayon sa ila nga operasyon — kag sa nahambal na — nagahulag ang tanan santo sa kun ano ang plano, kag posible gid nga makumpleto ini nga hulag sa husto nga tion.
SUNO SA CHINA
Ginpanginwala man sang China nga naghingyo ang Russia sang military equipment kag iban pa nga suporta halin sang ginpatigayon ang invasion sa Ukraine.
Ginpahayag man sang China nga nagapalapta ang Estados Unidos sang sala nga impormasyon nga tuman ka delikado.
Suno kay Chinese foreign ministry spokesman Zhao Lijian, sa baylo nga palalaon ang sitwasyon, dapat na nga magpangita sang diplomatic solution.
SUNO SA ESTADOS UNIDOS
Nagpaandam naman ang Estados Unidos nga mangatubang ang China sang kunsekwensya kun buligan sini ang Russia nga palagyuhan ang sanctions nga ginapangpataw batok sa ila pungsod kasunod sang pagsulod sini sa teritoryo sang Ukraine.
May mga wala ginhingadlan nga US officials nga amo ang nagsugid sa news outlets sa Estados Unidos nga nag-request si Russian President Vladimir Putin nga mag-provide ang China sang military assistance matapos ang invasion.
Ang military equipment nga ginhngyo ang ginapahayag nagalakip sang drones.
Suno kay US National Security Adviser Jake Sullivan , direkta nga nagapakig-angot ang Estados Unidos sa Beiing kag may yara sang ABSOLUTE CONSEQUENCES kun suportahan sang China ang Russia.
Ginpahayag man sang US nga apisar nakahibalo ang China sang plano si Putin antes ang invasion sa Ukraine sang Pebrero 24, posible suno sa US nga wala nahangpan sang China ang full extent sini ukon kun diin gid ini padulong. ###
