Ginsuyaan sang Russia ang resulta sang byahe ni Ukrainian President Volodymyr Zelensky sa Estados Unidos sang Amerika ilabi na kasunod sang ila pagbaisay ni President Donald Trump.
Suno kay Russian foreign ministry spokeswoman Maria Zakharova, isa ka “complete political and diplomatic failure” ang pagbisita ni Zelensky sa Washington.
Pahayag sang Russian official, bangud sa malain nga aktwasyon ni Zelensky sa White House, ginakumpirma lang sini nga siya ang pinakadelikado nga pamahog sa kalibutan.
Gintawag man niya ini nga “irresponsible warmonger” ukon tawo nga nagahaylo nga mangin agresibo batok sa iban nga pungsod ukon grupo.
Gin-akusaran man sang Russia si Zelensky nga “obsessed” ini sa gyera.
Suno pa kay Zakharova, magapabilin kag indi magbag-o ang military goals sang Russia sa Ukraine.
Matandaan nga matapos ang natabo sa White House, maisog nga nagtindog ang lideres sang iban nga mga nasyon ilabi na sa Europa agud nga suportahan si Zelensky.
Lakip sa nag-post sang ila suporta amo ang Germany, France, Spain, Poland kag the Netherlands nga isa-isa man nga ginpasalamatan sang Ukrainian leader.
Nahibaluan nga ginapadayaw sang Moscow nga mas may padaog sila sa Ukraine sa gyera, kag kapoy na kag kulang sa hinganiban ang army sang kaiping nga pungsod. Nag-umpisa ang full-scale offensive sang Russia sa Ukraine sadtong 2022.
