Nagapati ang isa ka geopolitics expert nga handa ang Russia batok sa mga sanctions nga ginapatuman subong sang Western countries umpisa sang ginsulod sini ang teritoryo sang Ukraine.
Sa interview sang Bombo Radyo kay Professor Clarita Carlos sang University of the Philippines, iya ginpahayag nga sang ginsalakay sang Russia ang Crimean Peninsula sang Ukraine sang 2014, nagpataw man ang Estados Unidos kag ang kaalyado nga mga pungsod sang economic sanctions sa Russia apang daw wala man sang natabo.
Ini bangud kontrolado man sa gihapon sang Russia ang Crimea tubtub subong kag nagsanyog man liwat ang ekonomiya sang Moscow sa pagdumala ni Russian President Vladimir Putin.
Apisar may mga sanctions subong nga ginapatuman, wala man nalakip ang dalagku nga mga bangko sang Russia kag talalupangdon nga magagmay lang nga lenders ang gin-target sang Western countries.
Suno kay Carlos, kun i-sanction sang West ang mga bangko sang Russia, magabalik man ini sa ila bangud madalahig man ang ila kaugalingon nga mga bangko.
Lakip sa mga nagpataw sang sanctions sa Russia amo ang European Union, Japan, Australia, New Zealand, Taiwan, Estados Unidos, kag United Kingdom.
