Ginpahayag sang Russia nga sa ila na ang full control sa steel plant sa Mariupol sa Ukraine kag napasungka na ang nabilin nga Ukrainian force nga amo ang nagadepensa sa amo nga syudad.
Suno kay Igor Konashenkov, spokesman sang Russian defense ministry, ginkumpirma na ni Russian Defense Minister Sergei Shoigu kay President Vladimir Putin ang “complete liberation” sa Azovstal plant kag sa Mariupol nga gintiniran anay sang Ukrainian militants.
Importante para sa Russia ang pagsakop sa Mariupol agud nga dalayon na nga malab-ot ang target nga kontrol sa eastern region sang Donbas sa Ukraine kun sa diin nagapuyo ang pro-Russian separatists.Ang Mariupol amo ang area nga nagaangot sa Donbas region sa Crimea.
Nasakop na sang Russia ang Crimea sang nagligad pa nga 2014.
Ginpahayag man sang Russia nga 2,439 ka tawo nga nagatinir anay sa planta ang nagsungka na gid man sa Russian forces.
Yari ang pictures sang last batch sang Mariupol defenders nga nag-surrender sa Russia. Indi pa sigurado kun ano ang ila nga mangin kapalaran pagkatapos sini.
Ini nga service members sang Ukrainian armed forces ang nag-surrender mismo sa Azovstal steel mill sa Mariupol.
Ang Azovstal steel mill amo ang ila nangin palanaguan kag proteksyon samtang ginpadayon sang Russia ang pagpang-atake halin sang naglinigad pa nga bulan. ##
