Naglunsyar ang Russia sang isa sa pinakadako nga pag-atake gamit ang ballistic missiles sa Kyiv nga capital sang Ukraine.
Suno kay Ukrainian President Volodymyr Zelensky kapin sa 40 ka missiles ang ginpalupok, lakip ang 25 ka ballistic missiles.
Patay naman ang isa ka tawo samtang 16 naman ang nasamaran sa nasambit nga pag-atake sa nasambit nga lugar.
Samtang sa iban pa nga bahin sa Ukraine, apat ka tawo ang napatay kag 20 ang nasamaran matapos maigo sang Russian airstrike ang isa ka bodega sa Kharkiv.
Suno sa gobyerno sang Ukraine, nakaapekto ang kakulangan sang Patriot air defense missiles sa ila abilidad nga depensahan ang pungsod batok sa ballistic missiles halin sa Russia.
Nagpahayag naman ang Ukrainian Air Force nga na-intercept nila ang 17 sa 25 ka ballistic missiles nga ginpalupok sang Russia.
Pahayag sang Russia nga mga military facility kag logistics hubs ang ila gintarget kag padayon nila nga ginapanginwala ang pag-atake sa mga sibilyan sang Ukraine.
