ILOILO CITY – Nagpabutyag ang Kremlin sang “solidarity” ukon pag-isa sa China sa stand sa Taiwan matapos ang pagpaandam ni Chinese President Xi Jinping kay US leader Joe Biden nga indi magpahibalot sa self-ruled island.
Suno kay Kremlin spokesman Dmitry Peskov, maga-isa sila sa China.
Ginarespeto nila ang soberanya kag territorial integrity sang China kag nagapati sila nga wala sang pungsod sa kalibutan ang may kinamatarong nga mag-question sini.
Nagapati sila nga ang amo nga akto sa international arena ang makatuga gid lamang sang dugang nga tension.
Nahibaluan nga sang Huwebes, nagpaandam si Xi sa US president nga indi magpahilabot sa Taiwan sa ginpatigayon nga malawig nga telephone call nga ginpahayag sang White House nga may katuyu-an nga solbaron ang indi maayo nga relasyon sang duha ka superpower countries.
Ginpabaskog pa sang Beijing ang maayo nga pag-abyanay sa Russia samtang nga ginadagdagan sang sanction sang Western nations si President Vladimir Puti bangud sang pagpang-atake sang Moscow sa Ukraine.
Ang Democratic Taiwan naman ang yara sa idalom sang pamahog nga sakupon sang China.
Ang pagpang-atake naman sang Russia sa Ukraine ang ginakabalak-an nga himuon man sang China sa Taiwan.
