Ginpahanugutan na nga makahampang sa Beijing Winter Olympics ang Russian figure skater nga si Kamila Valieva matapos nadesisyunan sang Court of Arbitration for Sport (CAS) nga indi ini pag-suspendihon sa hampang bisan napaslawan nga makapasar sa drug test.
Magahampang ang 15 anyos sa women’s singles event subong nga adlaw.
Suno kay Matthieu Reeb, CAS director general, gin-reject nila ang mga apelar sang International Olympic Committee, World Anti-Doping Agency kag International Skating Union nga i-suspende si Valieva sa hampang bangud menor de edad ini kag makabig nga ”protected person.”
“The panel considered that preventing the athlete to compete in the Olympic Games would cause her irreparable harm in these circumstances.”
Matandaan nga Disyembre 25 sang nagkuha si Valieva sang drug test.
Apang sang naggwa ang resulta kag nangin positive ini sa amo nga test, nag-umpisa na ang hampang sang 15 anyos sa Olympiada sa diin nakuha pa sini ang bulawan nga medalya.
Pahayag ni Reeb, indi sala ni Valieva nga ulihe na naggwa ang resulta sang drug test — sa tunga-tunga mismo sang Olympic Winter Games.
