Nag-desisyon ang isa ka Russian journalist nga nagdaog sang Nobel Peace Prize sang nagligad nga tuig nga ipa-auction ang iya nga medalya agud makatipon sang pondo nga ibulig sa mga Ukrainian refugees.
Si Dmitry Muratov, editor sang Novaya Gazeta amo ang kaupod sang Filipino-American journalist nga si Maria Ressa nga napasidunggan sang 2021 Nobel bangud sang ila pag-proteher para sa “freedom of expression.”
Suno kay Muratov, ibaligya niya ang iya nga medalya agud nga buligan ang pilason kag masakiton nga mga kabataan nga nagakinahanglan sang pagbulong kasunod sang Russian invasion sa Ukraine.
Ang matipon nga pondo ang maga-diretso sa The Foundation of Assistance to the Ukrainian Refugees, isa ka non-government organization nga nagahatag-suporta sa mga refugees.
Matandaan nga una nga bahin sang Marso, nagpahayag na ang newspaper kun sa diin nagatrabaho si Muratov nga kakason nila ang ila nga materyal sa military actions sang Russia sa Ukraine halin sa ila website bangud sang “censorship”.
Ginpahayag nga kasunod ini sang mga pamahog nga patyon ang mga journalists kag mga residente sa Russia nga naga-kontral sa official line sang gobyerno. ##
